‪ដំណើរនារីឯករាជ្យ‬

អាល់បឺត អាញស្ដាញ [ Albert Einstein ] មានអត្ថវាចាចំពោះនារីថា « នារីដែលធ្វើតាមគេតាមឯង នឹងមិនដើរទៅណាឆ្ងាយពីមនុស្សទាំងនោះជាធម្មតាទេ តែនារីដែលដើរម្នាក់ឯង ទំនងអាចរកឃើញខ្លួនឯង លើវិថីដែលមិនធ្លាប់មានមនុស្សដើរពីមុនមក»។ ដើរជាក្រុម ជាចំណូលចិត្តមួយផ្នែករបស់នារីៗ។ គេធ្វើអី ខ្ញុំធ្វើហ្នឹងដែរ តែៗស្ករៗ បបរៗបាយៗ ។ ឃ្លាទាំងនេះ មានន័យថា នាងចូលចិត្តធ្វើអ្វីតាមគ្នា។ តាមគេមិនមែនជាខ្លួនឯង អ្វីដែលខុសពីខ្លួនឯង នាងនឹងមិនសូវមានចំណូលចិត្ត ខ្វះចំណូលចិត្តស្មើនឹងមិនបានការ។ បើជ្រុលជាជោគជ័យ ក៏ជាជោគជ័យបែបសាមញ្ញៗ ដែលគេផ្សេងៗក៏អាចធ្វើបានដូចគ្នា។

ផ្ទុយពីដំណើររបស់នារីឯករាជ្យ។ នាងហ៊ានដើរដោយខ្លួនឯង រឹងមាំដោយខ្លួនឯង សម្រេចចិត្តដោយខ្លួនឯង បរាជ័យឬជោគជ័យ ក៏នាងក្លាហាននឹងទទួលដោយខ្លួនឯង។ នាងធ្វើអ្វីៗជាខ្លួនឯង មិនចាំបាច់ក្រែងចិត្ដនរណា ហ៊ានក្លា មោះមុត ធ្វើរឿងត្រឹមត្រូវមួយដោយមានជំហររឹងបឹុង។ ជាលទ្ធផលដែលនាងទទួលបានគឺជាបទពិសោធន៍ដ៏អស្ចារ្យជាច្រើនដែលអ្នកដទៃមិនធ្លាប់មាន។ បទពិសោធន៍ទាំងអស់នេះហើយ ធ្វើឲ្យនាងក្លាយជានារីម្នាក់ ដែលអាចផ្លាស់ប្ដូរខ្លួននាងបាន នឹងមានសេរីភាពជំនះឧបសគ្គទាំងឡាយ។ ជាពិសេសនាងជានារីដែលសង្គមតែងត្រូវការជាចាំបាច់៕ The woman who follows the crowd will usually go no further than the crowd. The woman who walks alone is likely to find herself in places no one has ever been before. — Albert Einstein អត្ថបទ ៖ បន្សុទ្ធចំណេះដឹងពីសៀវភៅ Picture : Pinterest