តោះស្រីៗយើង នរណាខ្លះមិនធ្លាប់ឡើងភ្នំហើយមានគម្រោងឡើងភ្នំ។ ទាំងនេះជាការចែករំលែកបទពិសោធន៍ លើកទី១ឡើងភ្នំ(ភ្នំខ្នងផ្សា)
ទី១. ដើម្បីឆាប់បានទៅដល់និងទាន់ពេលព្រឹកមិនក្តៅនិងទាន់ទេសភាពថ្ងៃលិចលើភ្នំ គួរចេញពីភ្នំពេម៉ោង៤ឬ៤កន្លះ ទៅដល់សហគមន៍ព្រៃឈើ ភូមិតាំងបំពង់ តំបន់រលាក់កងជើង ឃុំតាសាល ស្រុកឱរ៉ាល់ចំណាយពេលប្រហែល ៣ម៉ោង តាមការបើកបរយឺតឬលឿន។
ទី២. ពេលទៅដល់សហគមន៍ទីស្នាក់ឧទ្យានជាតិជួរភ្នំក្រវាញ ត្រូវបំពេញឯកសារចុះឈ្មោះ រួចត្រូវថតរូបជុំគ្នាជាមួយបងៗក្រុមការងារនៅទីនោះ(កុំភ្លេចត្រូវបំពេញឈ្មោះគ្រប់គ្នានិងថតរូបជុំគ្នា ព្រោះការធ្វើបែបនេះគឺដើម្បីការពារប្រសិនបើមានការបាត់ខ្លួនឬបញ្ហាផ្សេងៗ)។
ទី៣.បន្ទាប់មកត្រូវសំដៅទៅផ្ទះសហគមន៍ដើម្បីរកគោយន្តជិះដោយត្រូវចំណាយថវិកាខ្លះៗដើម្បីឱ្យពួកគាត់ជូនយើងទៅ និងនាំផ្លូវឡើងភ្នំ តម្លៃនេះអាស្រ័យលើការចរចារ។ កាលដែលត្រូវមានអ្នកនាំផ្លូវគឺងាយស្រួលសម្រាប់យើងដែលមិនមានបទពិសោធនឡើងភ្នំ ពូៗគាត់មានជំនាញ និង យកចិត្តទុកដាក់យើងបានយ៉ាងល្អ។
ចំណាំ៖សូមរៀបរាប់ពីសម្ភារៈដែលគួរត្រៀមយកទៅបន្តិចសិន។ ចំពោះសម្ភារៈត្រូវស្ពាយ បើស្រីៗគួរត្រឹម៤ ឬ៥គីឡូ បានហើយ កុំដាក់សំលៀកបំពាក់ទៅច្រើនពេកប្រយ័ត្នឡើងភ្នំមិនដល់គោលដៅ ឬត្រូវទំលាក់ចោលពាក់កណ្តាលផ្លូវ។ និយាយមែនគួរប្រើសំលៀកបំពាក់ស្រាលៗ កុំឱ្យតឹងណែន ឬពិបាកធ្វើចលនា។ បើមានភ្លៀងសត្វទៀកស្អាតៗប្រាកដជាចេញមកទាំងហ្វូង ចឹងត្រូវពាក់ស្រោមជើងវែងៗ ជាមួយខោស្បែករឹប(ឧ.ខោស្បែកង្កែប)
ជ្រើសរើសស្បែកជើងឡើងភ្នំទើបល្អជួយទប់កុំឱ្យរអិល មួយទៀតកុំភ្លេចដាក់ស្បែកជើងពាក់ធម្មតាទៅមួយគូរទៀត ព្រោះងាយស្រួលដើរពេលដល់កំពូលភ្នំវាលស្មៅច្រើន។ ចំពោះស្បៀងវិញ អាហារគ្រៀមៗមានត្រីងៀត មី សាច់ផាត់ នំប៉័ង ត្រីខ ឬអាហារផ្សេងទៀតដែលអាចទុកបានយូរ។ ចំពោះទឹកផឹកវិញ គួរត្រៀមឱ្យបានច្រើនអាចម្នាក់ ២ដបធំៗ(ដប១លីត្រកន្លះ) ព្រោះនៅលើនោះទឹកមិនសូវ មានច្រើន ហើយទីតាំងក៏ឆ្ងាយពីប្រភពដែលហើយទឹកនោះត្រូវដាំទើបផឹកបាន(ទឹកនៅទីនោះត្រជាក់ដូចទឹកកកចឹង ត្រជាក់ដល់ឆ្អឹងខ្នង)។ អូ! កុំភ្លេចទិញស្លឹកក្រូចសើច ឬក្រូចសើចយកទៅផង ពុះជាពីរបោះជុំវិញទីតាំងយើងបោះតង់ការពារបងវើកៗមកលេងយ៉ាត់ដេកមិនបាន។ មួយទៀត យកអាវភ្លៀង ពិល ថ្នាំរាគ ក្តៅខ្លួន ផ្កាសាយ ថ្នាំរឹត ផ្សេងៗទៀតទៅជាមួយផង។
ចំនុចពិសេស៖ គ្មានបង្គន់អនាម័យស្អីទេ ចឹងពិបាកបន្តិចសម្រាប់ស្រីៗ វិធីសាស្ត្រឈ្នះៗរបស់ស្រីៗ យកថង់ប៉ាវទៅ ជាមួយ រួចដំាបង្កោលជាមុំបួនហើយរុំព័ន្ធជុំវិញសម្រាប់ជួយដោះទុកមួយគ្រាដែរ។
ទី៣. ចំងាយពីភូមិទៅជើងភ្នំចំណាយពេប្រហែល១ កន្លះម៉ោង ផ្អែកលើស្ថានភាពផ្លូវពិបាកឬស្រួល បើមានភ្លៀងដូចកាលខ្ញុំទៅវិញអស់អីនិយាយជាំគ្រប់កន្លែង។ ពេលទៅដល់ជើងភ្នំត្រូវតាំងចិត្តឱ្យមាំ បើមិនចឹងជួយអត់បានទេ វគ្គនេះជាវគ្គអត្តាហិ អត្តនោនាថោហើយ។
ទី៤. ចំណាយពេល៤ទៅ៥ម៉ោង បានដល់ទីតាំងបោះតង់។ ទីតាំងបោះតង់មាន៥កន្លែងកន្លែងទី១ និងទី២ នៅជិតប្រភពទឹកតែឆ្ងាយពីទេសភាពស្អាតៗ។ ទីតាំងពី៣ ត្រូវប្រើពេលប្រហែល១ម៉ោង នៅកន្លែងវាលស្មៅស្អាតធំធេងណាស់ព្រះអើយ បោះកន្លែងណាក៏បាន។ ទីតាំងទី៤ ត្រូវចំណាយពេលប្រហែល១ម៉ោងកន្លះ ឬ២ម៉ោង បោះនៅក្បែរកំពូលភ្នំ រីឯកន្លែងទី៥បោះនៅលើកំពូលភ្នំតែម្តង ភ្ញាក់ឡើងឃើញពពកនៅជិតខ្លួន ព្រះសូរិយាញញឹមដាក់តែម្តង។កាលខ្ញុំទៅខ្ញុំបោះតង់ត្រឹមទីតាំងទី៣ព្រោះមានមនុស្សច្រើន មានគ្នាច្រើនចឹងកក់ក្តៅ...ហិហិហិ។ សម្រាប់អ្នកបោះតង់នៅទីតាំងទី១ ទី២ ទី៣ ត្រូវងើបពីម៉ោង៣ ឬ៤ ទៅកំពូលភ្នំបើមិនចឹងទៅមិនទាន់ពពកនិងព្រះសូរិយាទេប្រាប់ឱ្យហើយយ៉ាត់ស្តាយទៅហ្នឹងគេដែលអត់បានឃើញ។ ទៅដល់នោះទេសភាពខ្ជិលយាយ ឋានសួគ៌ជាគ្នា ចង់ថតកន្លែងណាក៏ស្អាតដែរ ទេសភាពមិនឱ្យខកចិត្តនោះទេ(តែនេះអាស្រ័យលើអាកាសធាតុដែរណា)។
ពេលយប់ចង់ធ្វើអីធ្វើទៅ ផឹកតែក្តៅៗក៏បាន លេងហ្គេមជាក្រុមក៏បាន កាលខ្ញុំទៅបងៗមួយក្រុមនោះច្រៀងខារ៉ាអូខេ សុទ្ធតែបទចាបយំល្វើយៗ។
ទី៥. ថ្ងៃត្រលប់មកវិញ ត្រូវសម្អាតបរិស្ថានកន្លែងបោះតង់នោះឱ្យស្អាត ត្រូវដុតសម្រាមនោះឱ្យអស់ ចូលរួមស្រលាញ់បរិស្ថាននោះបរិស្ថានស្រលាញ់យើងវិញ។
ទី៦. ពេលចុះគឺលឿនជាងពេលឡើង អ្វីដែលសំខាន់ត្រូវដឹងពីរបៀបប្រើជើងពេលចុះ ដាក់ជើងមិនឱ្យត្រង់រហូតទេ វាងាយនឹងឈឺម្រាមជើងដោយសារប្រឹងទប់ គួរដាក់ជើងចំហៀងវិញ។ បើពេលខ្ញុំមិនថាឡើងភ្នំ ឬពេលចុះពីភ្នំទេ មេឃភ្លៀងសាហាវកប់ ព្រឺក៏ព្រឺរាម រងារក៏រងារញាក់ មិនប្រយ័ត្នរអិលដួលជាំទៀត។ នៅតាមផ្លូវកុំចោលសម្រាមផ្តេសផ្តាស ច្រកថង់ទុកដាក់ស្រួលបួលពេលចុះពីភ្នំវិញមិនមែនបោះចោលតាមផ្លូវនោះទេ។ មួយទៀតកុំភ្លេចចូលថតរូបម្តងទៀតនៅសហគមន៍ទីស្នាក់ឧទ្យានជាតិជួរភ្នំក្រវាញជាមួយបងៗក្រុមមការងារដើម្បីបញ្ជាក់ពីចំនួនត្រឹមត្រូវ។
បញ្ជាក់៖ ការឡើងភ្នំមិនមែនចេះតែតាមគេតាមឯងនោះទេ ត្រូវស្ទង់មើលពីសុខភាពខ្លួនឯង ជាមុនព្រោះត្រូវប្រយុទ្ធដូចសមរភូមិចឹង។ មួយវិញទៀត អ្នកទាំងអស់គ្នាដែរឭថា ភ្នំជួយជីវិតមនុស្សទេ? ជូនចំពោះអ្នកកំពុងមានបញ្ហាបាក់ទឹកចិត្ត ឬជំងឺ Depressions មុននឹងគិតអីផ្តេសផ្តាស គួរទុកឱកាសឱ្យខ្លួនឯងបានឡើងភ្នំ ឃើញទេសភាពធម្មជាតិដូចឋានសួគ៌ជាមុនសិនហើយគ្រប់យ៉ាងនឹងផ្លាស់ប្តូរការគិតរបស់អ្នក ស្គាល់ពីតម្លៃនៃជីវិត បើគិតថាខ្លួនឯងឥតប្រយោជគួរធ្វើរឿងឱ្យមានប្រយោជនដើម្បីរក្សាធម្មជាតិល្អជាជាងការគិតខ្លី។
#ស្រលាញ់រូបនេះជាងគេមានទង់ជាតិខ្មែរ
#ខ្នងផ្សា#កំពង់ស្ពឺ#កោះកុង#ពោធិ៍សាត់#ឋានសួគ៌លើទឹកដីអច្ឆរិយនៃកម្ពុជា
